PND比較迷戀角落，唔使阻住其他人，喺一個最珍貴嘅角落嘆芝士雞蛋多士、最好味嘅brownie，睇佢地嘅書，玩佢地嘅ukulele玩一個下午，就係大家渴望嘅lifestyle 。
穿過三層樓梯，呢個唐樓小角落係夫婦二人打理，慢功出細貨，呢度嘅節奏係享受、慢活。有大約三十個位，可以任坐，有梳化有普通枱，亦都有書藉、少量遊戲提供。
已係cafe內最貴嘅食物：Just Breakfast$69，一份有誠意嘅早餐，炒得熱又脆嘅多士、滑滑嘅炒蛋、粟米、沙律菜、烤蕃茄、焗豆、三條香腸，其中仲有PND好鍾意嘅芝士腸(見左下圖)，一切開已經漏芝士，搭其他食材都好夾！
其他嘅小食都係$20-$49，偷睇見到用料好有心，實在覺得以銅鑼灣小店嚟講實在非常有良心。
一份芝士雞蛋厚多士$29，等咗20分鐘，原來因為老闆娘忙得滯煮過火決定再整過，於是，一份追求完美嘅芝士流心蛋多士就出世喇！多士熱辣辣，鋪滿嘅芝士咸咸香香，督督面頭嘅蛋黃哥，等佢流出去芝士上面，非常香口！
呢份Brownies$20，係PND意外嘅禮物，唔推介唔得，因為啱啱出爐香味四溢全cafe都充滿朱古力香！(因為開放式廚房)一入口，不得了，外皮有份量嘅微微焦脆，brownie中心啱啱好嘅濕潤，朱古力味好香，無死甜，唔會有油膩感，業餘水準有餘～
其他小食好似北海道牛乳布甸仲有食到PND心心眼嘅一口芝士酥，味道實在令人感到溫暖！就咁樣，坐一個下午，真係好舒服。期待佢地嘅進步，可以做埋晚市就好～
Just Cafe
電話：55977550
星期一至六 14:00-19:00（試業期間）
#PND銅鑼灣 #PNDCafe #PND小食 #PND西式
@銅鑼灣駱克道514號3樓
Search